प्रधानमन्त्री पुष्पकमल दाहाल प्रचण्डले विश्वासको मत लिन नसकेपछि राष्ट्रपतिले ७२ घन्टे समयसीमा तोकेर प्रधानमन्त्री लागि माग दाबी गर्न दलहरुलाई आग्रह गरेकी छिन् । यससँगै नेकपा एमाले अध्यक्ष केपी शर्मा ओलीले प्रधानमन्त्री पदमा दावी पेस गर्न राष्ट्रपतिसमक्ष पुगेका छन् । ओलीले आफ्नो पार्टी एमाले र कांग्रेसका सांसदको समर्थनमा प्रधानमन्त्री पदमा दाबी पेस गरेको जनाएको हो ।
दावी पेस गर्दा उनले १६६ सांसदको समर्थन जुटाएर राष्ट्रपतिसमक्ष पत्र बुझाएका थिए । ओलीले कांग्रेसका ८८ र एमालेका ७८ सांसदको समर्थन रहेकाले संविधानको धारा ७६ को उपधारा २ अनुसार आफूलाई प्रधानमन्त्री नियुक्त गर्न राष्ट्रपतिसमक्ष पत्र बुझाएका हुन् ।
सत्ता यात्रामा मसिना दलहरु जसपा, जनमत, लोसपा, जसपा नेपाललगायतका दल साथ दिन सकारात्मक रहेका छन् ।यस अघि नै काँग्रेस एमालेको नयाँ समीकरण बनिसकेको हल्ला सामाजिक सञ्जालमा भाइरल बनेको थियो । राष्ट्रपतिले संविधान अनुसार नयाँ प्रधानमन्त्री छनोट गर्ने समय सीमा आइतबार सम्म तोकेकी छिन् । प्रधानमन्त्री छनोट नहुन्जेल प्रधानमन्त्री पुष्पकमल दाहाल प्रचण्डले नै कार्यभार संचालन गर्नेछन् । प्रधानमन्त्री रहँदा प्रचन्डले विश्वासको मत पाउँ भनि राखेको प्रस्तावको पक्षमा ६३ मत आएको थियो भने विपक्षमा १९४ मत आएको थियो। त्यस्तै तटस्थमा १ मत परेको थियो । शुक्रबार संसदमा २५८ जना सांसद उपस्थिति थिए ।
२७५ सदस्यीय प्रतिनिधिसभामा विश्वास प्राप्त गर्नका लागि १३८ मत चाहिनेमा प्रचण्डले त्यो भन्दा कम मत पाएपछि उनी स्वत: पदमुक्त भएका हुन् ।
प्रचण्डले सरकारको नेतृत्व गरेको १८ महिनाको अवधिमा पाँचौं पटक संसदबाट शुक्रबार विश्वासको मत माग्नु परेको थियो । यसअघि ४ पटक विश्वासको मत पाएका उनी पाँचौ पटकमा भने विश्वासको मत पाउन असफल भए ।यससँगै उनी बालुवाटार छाडेर निजी निवास खुमबहादुर लाग्ने जनाएको छ।
