काठमाडौं— शिक्षा तथा मानव स्रोत विकास केन्द्रको प्रारम्भिक बालविकास शाखाले अभिभावक शिक्षा प्याकेज कार्यान्वयनबारे सबै स्थानीय तहलाई गत असार २७ गते पत्र पठाएको छ ।
शाखा अधिकृत धनसूधन चौलागाँईले बालविकाससम्बन्धी हकको कार्यान्वयन गर्न अभिभावक सचेतना व्यापक रूपमा गर्नुपर्ने आवश्यकता देखिएको बताएका छन् ।
त्यसका लागि केन्द्रले ‘अभिभावक शिक्षासम्बन्धी सहजकर्ताका लागि सन्दर्भ सामग्री’ (प्याकेज) र सोसम्बन्धी ‘चित्रात्मक पुस्तिका’ तयार गरी शिक्षा तालिक केन्द्र र केही स्थानीय तहबाट शिक्षा अधिकृतहरूको सहभागितामा केन्द्रीयस्तरको प्रशिक्षणसमेत सञ्चालन भई प्रदेशगतस्तरमा प्रशिक्षक तयार गरिएको पत्रमा उल्लेख छ ।
शाखा अधिकृत चौलागाँईले स्थानीय तहबाट उक्त प्याकेजका आधारमा अभिभावक शिक्षा कार्यक्रम सञ्चालन गर्न अनुरोध गरेका छन् । त्यसका लागि केन्द्रबाट सहजीकरण गरिने बताइएको खबर न्युज गृहमा प्रकाशित भएको छ ।
