कञ्चनपुरको भीमदत्त नगरपालिकाले बजार क्षेत्रको फुटपाथ खाली गराउन सुरु गरेको छ। महेन्द्रनगर बजार क्षेत्रका केही व्यवसायीहरुले फुटपाथ मिचेर सामान राख्नेदेखि भौतिक संरचना निर्माण गर्नेसम्मका कार्य गरेपछि खाली गर्न सुरु गरिएको हो।
सोमबारदेखि नगर प्रहरीको टोलीले बजार क्षेत्रका फुटपाथमा राखिएका सामान पालिकाले नियन्त्रणमा लिएको छ। फुटपाथमा राखिएका साइनबोर्ड, टेबुल, भ¥याङसहितमा सामान नगरपालिकाले हटाएको हो। बजार क्षेत्रमा व्यवसायीले पैदल यात्रुलाई समस्या हुने गरी फुटपाथ कब्जा गरेपछि नगरपालिका एक्सनमा उत्रिएको हो।
भीमदत्त नगरपालिकाकी उपप्रमुख निलम लेखक (जोशी)ले व्यवसायीहरुले फुटपाथ कब्जा गरेको ब्यापक जनगुनासो आएपछी पालिका एक्सनमा उत्रिएको बताइन्। ‘यात्रु हिँड्ने फुटपाथ पनि कब्जा गर्दा पैदल यात्रुलाई समस्या भयो,’ उपप्रमुख लेखकले भनिन्, ‘मापदण्डविपरीत बनाएका संरचना एवं सामान नियन्त्रणमा लिँदै कार्बाही गरेका छौँ।’
पटकपटक सूचना आह्वान, अनुरोध एवं अनुनय विनय गर्दा समेत अटेरी गरेपछि बाध्य भएर संरचना हटाउन शुरु गरेको उपमेयर लेखकले बताइन्। ‘बजार स्वच्छ, सफा एवं सबैलाई सहज गराउने हाम्रो उद्देश्य हो,’ उनले भनिन्, ‘कसैलाई दुख दिने भन्ने होइन।’
नगरपालिकाले व्यापारीले कब्जा गरेको फुटपाथ हटाउन थालेपछि स्थानीयबासीले सो कदमको स्वागत गरेको समाचार नयाँ पत्रिकामा प्रकाशित छ ।
