चिसो बढेसँगै हुम्लाका विद्यालयमा हिउँदे बिदा अझै, काठमाडौंमा माघ ३ तिर विद्यालय चल्न सुरु

चिसो बढेसँगै हुम्लाका विद्यालयमा हिउँदे बिदा दिइएको छ। चिसो बढ्न थालेपछि सामुदायिक तथा निजी विद्यालयमा हिउँदे बिदा दिइएको हो। काठमाडौं उपत्यकामा भने केहीमा २६,२७ गते बिदा सकिएर पढाइ सुचारू भइरहेको छ भने केही ठाउँमा माघ ३ गतेबाट पढाइ सुरु हुने जानकारीमा आएको छ । काठमाडौं उपत्यकामा हिउँद याममा कक्षा दश बाहेकका कक्षाहरु १ हप्ता जति बिदा दिइएको छ ।

जिल्लाको सातवटा स्थानीय तहभित्रका विद्यालयले वार्षिक परीक्षा सकिएकाले बिदा दिइएको छ। बन्द भएका विद्यालय अब आगामी फागुन २ गतेदेखि मात्रै सञ्चालनमा आउने शिक्षा विकास तथा समन्वय एकाइका निमित्त प्रमुख भीमराज खत्रीले बताएका छन् ।

नियमानुसार हिमाली जिल्लाका विद्यालयमा हिउँद याममा अत्यधिक जाडो हुने भएकाले वार्षिक परीक्षा सकेर पुस-माघमा बिदा दिने चलन यथावत छ। तर, यस वर्ष ढिलागरी शैक्षिकसत्र सुरु भएकाले एक महिनामात्रै बिदा दिइएको उनले बताए।

जिल्लाभरि १५१ विद्यालयमा पठनपाठन बन्द भएको छ। हुम्लामा १४६ सामुदायिक, एउटा धार्मिक र चार संस्थागत विद्यालय छन्। जिल्लाका सात गाउँपालिकामध्ये नाम्खा गाउँपालिकामा १६, सिमकोटमा २३, खार्पुनाथमा १७, सर्केगाडमा ३२, चङ्खेलीमा २२, अदानचुलीमा १९ र ताँजाकोटमा १६ विद्यालय छन्।

एकाइका निमित्त प्रमुख खत्रीका अनुसार हिमालपारिको लिमीका दुई सामुदायिक विद्यालय गत कात्तिक अन्तिममै बन्द भएका थिए। हल्जी र जाङ्गगाउँका विद्यालय बन्द भएका हुन्। तीन गाउँ रहेको लिमीमा प्रत्येक गाउँमा एक-एक आधारभूत विद्यालय रहेका छन्।

जिल्लामा यस वर्ष अत्यधिक जाडो बढे पनि हिमपात भने हालसम्म परेको छैन ।