लक्ष्मी सनराइज र हिमालय बैंकलाई जरिवाना गरेको राष्ट्र बैंकले नबिल, एनएमबी, एनआईसी एसिया र सिटिजन्स बैंकलाई गरायो सचेत

नेपाल राष्ट्र बैंकले बैंकिङ नियम उल्लंघन गरेको भन्दै ६ वटा वाणिज्य बैंकलाई कारबाही गरेको छ । लक्ष्मी सनराइज र हिमालय बैंकलाई जरिवाना गरेको राष्ट्र बैंकले नबिल, एनएमबी, एनआईसी एसिया र सिटिजन्स बैंकलाई सचेत गराएको छ ।

लक्ष्मी सनराइज बैंकले सम्पत्ति शुद्धीकरणसम्बन्धी ऐन र निर्देशनको उल्लंघन गरेको भन्दै ७० लाख रुपैयाँ र हिमालयन बैंकले वैशाखमा कर्जा-निक्षेप अनुपात कायम नगरेको भन्दै १ करोड ६७ लाख ७१ हजार ४३४ रुपैयाँ जरिवाना गर्ने निर्णय राष्ट्र बैंकले गरेको हो ।

यस्तै एनएमबी बैंकले व्यावसायिक कृषि तथा पशुपन्छी कर्जा भनी अन्य प्रयोजनमा प्रवाह गरेको भन्दै सचेत गराइएको राष्ट्र बैंकले जनाएको छ । उसलाई ब्याज अनुदानको सम्पूर्ण रकम ऋणीबाट फिर्ता गराई राष्ट्र बैंकमा जम्मा गर्न निर्देशन दिइएको छ ।

नबिल बैंकले एकीकृत निर्देशन उल्लंघन गरी ब्याजदर बढाएको र सिटिजन्स बैंकले कर्जा सापटको वर्गीकरण नगरेको भन्दै राष्ट्र बैंकले सचेत गराएको हो । एनआईसी एशिया बैंकले ग्राहकसँग बढी लिएको ब्याज फिर्ता नगरेकाले फिर्ता गर्न निर्देशन दिँदै सचेत गराइएको छ । यो समाचार कान्तिपुर टिभी डटकममा प्रकाशित छ ।