नेपाली र अमेरिकी सेनाबीचको संयुक्त सैन्य अभ्यास आजदेखि नगरकोटमा सुरु भएको छ । संयुक्त सैन्य अभ्यास असोज १२ गतेसम्म चल्नेछ ।
यो अभ्यासमा नेपाली ३० र अमेरिकी १२ जना गरी ४२ जना सैनिक सहभागी रहेका नेपाली सेनाका प्रवक्ता सहायक रथी कृष्णप्रसाद भण्डारीले जानकारी दिए उनले यो हरेक वर्ष हुने नियमित अभ्यास हो र यसअघि ३९औँ अभ्यास भइसकेको बताए ।
संयुक्त अभ्यास मुख्य गरी विपद् व्यवस्थापन, खोज तथा उद्धार, मानवीय सहायता लगायतका विषयमा केन्द्रित रहनेछ । नेपाली सेनासँगको संयुक्त अभ्यासका लागि अमेरिकी सेनाको विशेष फौज गएको बिहीवार काठमाण्डौ आएको छ ।
नेपाली सेनाले विगतदेखि नै अमेरिका, बेलायत, भारत, चीन, श्रीलङ्का, मङ्गोलिया, बङ्लादेश, इजरायललगायत देशका सेनासँग संयुक्त तालिम र अभ्यास गर्दै आएको छ । सैन्य र प्राविधिक क्षमताका हिसाबले अगाडि रहेका देशका सेनासँगको तालिमले उनीहरुको ज्ञान नेपाललाई हस्तान्तरण हुने रथी भण्डारीले बताए ।