बडादशैंको आठौं दिन अर्थात् महाष्टमीका दिन देशभर माता दूर्गा भवानीको पूजा आराधना गरी महाअष्टमी पर्व मनाइएको छ। दशैंघर र कोतलगायत शक्तिपीठहरुमा बलिसहित पूजाअर्चना र दुर्गा सप्तशती पाठ गर्ने परम्परा छ।
काठमाडौंका दक्षिणकालीमा नवरात्रको समयमा अलि भीड लाग्ने गरेको छ ।बली दिने र नरिवल फुटाएर पूजा गर्न आउनेको संख्या दक्षिणकालीमा बढेको हो ।
गुह्येश्वरी, मैतीदेवी, कालिकास्थान, नक्साल भगवती, भद्रकाली, शोभाभगवती, विजेश्वरी, इन्द्रायणी, रक्तकाली, बज्रयोगिनी, संकटा, बज्रबाराहीलगायत शक्तिपीठमा बलि दिने प्रचलन छ।
यस्तै, काभ्रेस्थित पलाञ्चोक भगवती, बनेपाको चण्डेश्वरी, गोरखाको मनकामना, वीरगञ्जको गहवामाई, सप्तरीको छिन्नमस्ता, जनकपुर राजदेवी, डडेल्धुरा उग्रतारालगायत पीठहरुमा पूजाआराधना हुन्छ।
हनुमानढोकास्थित दशैंघरमा अष्ठमी मध्यरातमा शक्तिरुपिणी दुर्गा भवानीको पूजाअर्चना र हर्ष बढाइँ हुन्छ। त्यसक्रममा तलेजु भवानीलाई ५४ राँगा र ५४ बोकाको बली दिई कालरात्रि मनाउने गरिन्छ।
महाष्टमीकै दिन महाकालीस्वरुपा भद्रकालीको विशेष पूजा गर्ने गरिएको छ।
प्राचीन कालमा दक्षप्रजापतिको यज्ञ बिथोल्ने उद्देश्यले भद्रकाली करोडौं योनी–शक्तिका साथ आजकै दिन प्रकट भएको विश्वास छ। १६ वटा पूजा सामग्रीका साथ भद्रकालीको पूजाआराधना गरिन्छ।
