नेपाल पत्रकार महासंघले श्रमजीवी पत्रकार ऐनअनुसार पत्रकारले उठाएका जायज माग यथाशीघ्र सम्बोधनका लागि दबाब दिने उद्देश्यले कान्तिपुर मिडिया ग्रुपविरुद्ध अनिश्चितकालीन दबाबमूलक आन्दोलनको घोषणा गरेको जनाएको छ ।
सोमबार विज्ञप्ति जारी गरेर महासंघका महासचिव रोशन पुरीले कान्तिपुर मिडिया ग्रुपमा लामो समयदेखि उब्जिएको श्रमजीवी पत्रकारको समस्याका सवालमा पछिल्लो समय कान्तिपुरको व्यवस्थापन पक्ष र पत्रकारका प्रतिनिधिबीच भएको सहमतिलाई बहुसंख्यक पत्रकारले अस्वीकार गरेपछि श्रमजीवी पत्रकार ऐनअनुसार पत्रकारले उठाएका जायज माग यथाशीघ्र सम्बोधनको लागि दबाब सिर्जना गर्न नेपाल पत्रकार महासंघले आन्दोलनको घोषणा गरेको जनाएका छन् ।
घोषित कार्यक्रमअनुसार नेपाल पत्रकार महासंघले २०८० असोज ३० गते मंगलबार दिउँसो ३ बजेदेखि ४ बजेसम्म थापाथलीस्थित कान्तिपुर मिडिया ग्रुपमा १ घण्टा धर्ना दिने कार्यक्रम रहेको विज्ञप्तिमार्फत महासचिव पुरीले जनाएका छन् ।
‘यो धर्ना श्रमजीवी पत्रकार ऐनअनुसार पत्रकारले उठाएका जायज मागहरू पूरा नभएसम्म जारी रहने सबैमा जानकारी गराइन्छ’, पुरीले भेनका छन् ।
‘व्यवस्थापन पक्षले निष्कासन गरेका ८२ पत्रकारको पुनर्वहाली, अनधिकृत सरुवाको बदर र श्रमजीवी पत्रकार ऐनको पूर्ण कार्यान्वयलगायतका मागहरू अविलम्ब पूरा गर्न नेपाल पत्रकार महासंघले कान्तिपुर मिडिया ग्रुपसमक्ष पटकपटक आग्रह गर्दै आइरहेको थियो’, महासंघले भनेको छ ।
घोषित कार्यक्रममा सक्रिय सहभागिता जनाउन नेपाल पत्रकार महासंघ उपत्यकास्थित आफ्ना सबै शाखाका पदाधिकारी, सदस्य तथा विभिन्न सञ्चारगृहमा कार्यरत श्रमजीवी पत्रकार, पत्रकारका संघसंगठनका प्रतिनिधिलगायत श्रमजीवी पत्रकारका पक्षधर सबैमा महासंघले आग्रह गरेको छ ।
कान्तिपुर मिडिया ग्रुपका कर्मचारी र पत्रकारहरूले लामो समयदेखि तलब पाएका छैनन् । कान्तिपुर मिडिया ग्रुपका मालिक कैलाश सिरोहियाले धमाधम कर्मचारीलाई जागिरबाट निकालेका छन् ।
कान्तिपुर दैनिकको नाममा अनुकत कमाइ गरेका र राज्यबाट ठूलो कर मिनाहा पाउँदै आएका सिरोहियालाई पत्रकार महासंघले दशैँका बेला झुकाइ छाड्ने गरेर आन्दोलन घोषणा गरेको छ ।
कान्तिपुर दैनिक पत्रिका, कान्तिपुर टिभी र एफएममार्फत कान्तिपुर मिडिया ग्रुपका मालिक कैलाश सिरोहियाले धेरै हर्कत गरेको आरोप छ ।
पत्रकार र कर्मचारीलाई तलब नदिएर हैरान बनाएका कान्तिपुरका मालिक कैलाश सिरोहियाको सम्पत्ति छानविनको माग पनि उठेको छ । कान्तिपुरको आडमा कैलाश सिरोहियाको ठूलो साम्राज्य छ । त्यो साम्राज्य बचाउन उनले कान्तिपुर मिडिया ग्रुपलाई प्रयोग गर्ने गरेको आरोप छ ।यो समाचार रिपब्लिक दैनिकमा प्रकाशित छ ।
