वागमती प्रदेशको राजधानी काभ्रे हुनुपर्छ: जमरकट्टेल

बागमती प्रदेशका मुख्यमन्त्री शालिकराम जमरकट्टेलले बागमती प्रदेशको राजधानी काभ्रे उपयुक्त हुने बताएका छन् । प्रदेश भित्रका अधिकत्तम जिल्लाको लागि हेटौंडा अनुपयुक्त भएको भन्दै उनले प्रदेशको केन्द्र काभ्रे उपयुक्त हुने बताएका हुन् ।
शुक्रबार नेकपा (माओवादी केन्द्र) को मध्यपुर थिमी नगर समितिले आयोजना गरेको शुभकामना आदान प्रदान कार्यक्रमलाई शुक्रबार सम्बोधन गर्दै पूर्व ट्रेड युनियन कर्मी तथा मुख्यमन्त्री जमरकट्टेलले तत्कालीन सरकारले हेटौंडालाई प्रदेश राजधानी तोक्दा प्रदेशका १० जिल्ला अन्यायमा परेको गुनासो गरे ।
आफूले प्रदेश सरकारको नेतृत्व पाएपछि प्रदेशको भाषिक पहिचानका लागि भाषा विधेयक ल्याएको जानकारी गराउँदै नेवारी र तामाङ भाषालाई प्रदेशमा सरकारी कामकाजको भाषा बनाउन माग समेत भएको उनले बताए । तत्कालीन जनयुद्धमा नेवा: ताम्सालिङ घोषणा गरिएको प्रदेशमा नेवारी र तामाङ भाषालाई सरकारी कामकाजको भाषा बनाइनु रणनीतिक विजय भएको तर्क राखे । नेवा: र तामाङ कुनै जाति विशेषको कुरा नभई सभ्यता भएको भन्दै उनले यसलाई कुनै जाति सम्प्रदाय र समुदायमा संकुचित नगरी प्रदेशले सम्पत्तिको रुपमा लिनुपर्छ भनेका छन् ।
प्रदेश सरकारले स्वास्थ्य, शिक्षा, कृषि, पर्यटन र पूर्वाधार निर्माण लगायतको क्षेत्रमा उल्लेखनीय कार्य गरिरहेको जानकारी गराउदै वर्तमान ब्यवस्थाका विरोधीहरुले प्रदेश सरकारको बद्नाम गर्ने दुस्साहस गरिरहेका दावी पनि गरे ।

उक्त अवसरमा नेपाल सरकारको पूर्वमन्त्रीसमेत रहेकी नेकपा (माओवादी केन्द्र) की नेतृ शशि श्रेष्ठले पार्टी अध्यक्ष प्रचण्डको नेतृत्वमा सुशासन र भ्रष्टाचार नियन्त्रणमा ऐतिहासिक काम भएको भन्दै उनले देशको विकास र समृद्धिका लागि माओवादी केन्द्रको बिकल्प नभएको बताइन् ।

कार्यक्रममा पार्टीका भक्तपुर इन्चार्ज दिलिप प्रजापति, मुख्य मन्त्रीका प्रमुख राजनीतिक सल्लाहकार डिपी ढकाल, प्रदेश सांसदद्वय देवेन्द्र श्रेष्ठ र भुवकेशरी श्रेष्ठ भावना त्यसैगरी केन्द्रीय सदस्यहरू रामप्रसाद सापकोटा दिपशिखा, प्रतिमा श्रेष्ठ र उमा कपाली सहभागी कार्यक्रममा रक्तदान समेत गरिएको थियो ।
मध्यपुर थिमी नगरपालिकाको उपमेयर समेत रहेका माओवादी केन्द्रका स्थानीय नगर अध्यक्ष विजय कृष्ण श्रेष्ठको अध्यक्षतामा भएको सो कार्यक्रममा मुख्य मन्त्री जमरकट्टेललाई नेवारी तामाङ भाषा लाई मान्यता दिलाएको भन्दै सम्मान पत्र प्रदान गरिएको थियो भने पूर्व मन्त्री श्रेष्ठले मध्यपुर थिमिमा स्वबासीलाई लालपुर्जा दिलाउन पुर्याएको योगदानको कदर पर्दै कदर पत्र प्रदान गरिएको थियो । उनीहरू संगै मध्यपुर थिमिमा बिबिध बिधामा उल्लेखनीय योगदान गर्ने एक दर्जन बढी ब्यक्तित्वहरुलासमेत सम्मान गरिएको थियो ।