शिक्षक शिक्षिकाहरुको पेशागत हकहितको पक्षमा आवाज उठाउने नेपाल शिक्षक महासंघले आन्दोलनका कार्यक्रम घोषणा गरेको छ । बाहिर आएको विद्यालय शिक्षा ऐन २०८०मा प्रबन्ध गरेका केही दफाहरु संविधान प्रदत्त ट्रेड युनियन अधिकार, पेसागत सुरक्षा र स्वभिमान खिलाफमा रहेको भन्दै आन्दोलनका कार्यक्रम घोषणा गरेको हो ।
महासंघले २६ गते शुक्रबार प्रत्रकार सम्मेलन गरेर आन्दोलनका कार्यक्रम सार्वजनिक गरेको हो।जसमा पहिलो चरण अन्तर्गत २८ गते पालिकाहरुमा शिक्षक कर्मचारी उपस्थित भई ३ घण्टा धर्ना दिने, ३० गते जिल्लाको शिक्षा विकास तथा समन्वय एकाइमा धर्ना दिने,३२ गते प्रदेशको सामाजिक विकास मन्त्रालयमा धर्ना दिने, भदौं १ गते संसद सदस्यलाई जानकारी तथा पक्षीकरण गर्ने घोषणा गरेको छ ।
त्यसैगरी दोस्रो चरणमा संघीय शिक्षा ऐन संसदमा दर्ता भएको पाचौं दिनबाट देशभरका शिक्षक कर्मचारी उपस्थित भई काठमाडौं केन्द्रीत प्रदर्शन गर्ने जनाएको छ ।
कार्यक्रममा बोल्दै नेपाल शिक्षक महासंघकी अध्यक्ष कमला तुलाधरले सरकारले शिक्षकहरुका माग पूरा नगरेसम्म आन्दोलन नरोकिने र परिआए विद्यालय बन्द गरेर सडकमा उत्रने चेतावनी दिएकी छन् । महासंघले सरकारी शिक्षक शिक्षिकाहरुको पक्षमा वकालत गर्दै आएको छ । बोर्डिङ स्कुलका संस्थापकहरुको आन्दोलन भर्खरै सकिएपनि बोर्डिङमा कार्यरत शिक्षक शिक्षिकाहरुको पक्षमा आवाज उठाउने इष्टुको कुनै अवधारणा सार्वजनिक भएको छैन।
