रातो मच्छिन्द्रनाथको रथारोहण शनिबार हुने सम्भावना

९ साउन २०७७ काठमाडौं ।लकडाउनका कारण पटक पटक रोकिदै आएको रातो मत्स्येन्द्रनाथको रथारोहण शनिबार दिउँसो हुने भएको छ । शनिबार नागपञ्चमीकै अवसर पारेर बर्षाको देवता मानिने रातो मच्छिन्द्रनाथको रथारोहण पुल्चोकमा हुने पक्कापक्की भएको हो ।यस अघि साउन ७ गते बुधबारको पत्रमा जात्रा स्थगित गर्ने भनिएको थियो ।त्यही भएर पनि यो पटक पनि स्थगित हुनेमा सरोकारवालाहरु सशंकित बनेका छन्।

विहिबार दिउँसो करीब ३ घन्टा ललितपुर महानगर पालिकाको सभाहलमा मेयर चिरीबाबु महर्जन र मच्छिन्द्रनाथ गुठीबीच दबाबपूर्ण बैठ्कले रथारोहण गर्ने निर्णय गरेको बुझिएको छ । मत्स्येन्द्रनाथका ज्योतिषि, पानेजु (पुजारी), गुठियार, ज्यापू समाज, गुठी संस्थान र ललितपुर महानगरपालिका लगायत सरोकारवालाहरुको पुन: छलफलपछि शनिबार दिउँसो १२ बजेर ५ मिनेट वा १० मिनेटमा रथारोहणको साइत निकालेको मत्स्येन्द्रनाथका ज्योतिषि कीर्तिमदन जोशीले बताएका छन्।
ज्यापू समाजका अध्यक्ष चन्द्र महर्जनले भने- परम्पराअनुसार रथारोहण गरेको चार दिनभित्र रथयात्रा सुरु गर्नुपर्छ । कोभिड–१९ कारण लकडाउन पूरा रूपमा खुलेपछि मात्र रथयात्रा गरिने हुन सक्छ। यसअघि असार २४ गते रथारोहण गर्ने साइत जुरेपनि लकडाउनका कारण स्थगित भएको थियो । तिथिअनुसार रथारोहण वैशाख १२ गते गर्नु पर्दथ्यो । मत्स्येन्द्रनाथका ज्योतिषी जोशीका अनुसार नागपञ्चमीमा रथारोहण नभएमा दसैंसम्म अर्को साइत छैन । यसलाई मध्यनजर गरेर बिहीबार ३२ पानेजु संघ, ज्योतिषी, गुठियारलगायत अन्य सरोकारवालाहरू मिलेर ललितपुरका प्रमुख जिल्ला अधिकारी नारायणप्रसाद भट्ट र ललितपुर महानगरका मेयर चिरीबाबु महर्जनसमक्ष ध्यानाकर्षण गर्न पुगेका थिए । ललितपुरका प्रमुख जिल्ला अधिकारी भट्टले सरकारले तय गरेको मापदण्डमा रहेर ‘भीडभाड नगरी, सामाजिक दूरी कायम गर्दै मास्क र सेनिटाइजर प्रयोग अनिवार्य गरेर रथारोहण गर्न सकिने बताएका छन् । मत्स्येन्द्रनाथका पुजारी कपिलदेव वज्राचार्यले रथारोहण गर्न सम्पूर्ण तयारी पूरा भइसकेको बताएका छन् ।उनले बौद्ध परम्पराअनुसार प्राणप्रतिष्ठा गराई पुरुष र नारी दुवैलाई गरिने जातकर्म, नामकर्म, अन्नप्राशन, उपनयन, चूडाकर्म, इही (बेल विवाह) र गुफा राख्ने दसकर्म सबै विधि सम्पन्न भइसकेको छ,’ भनेका छन् । गुठी संस्थान ललितपुर शाखा कार्यालय प्रमुख राजन भुजुले गुरुजु पल्टनलाई पनि जानकारी गराइसकेको बताए । लकडाउनका कारण चैतमा गरिएको महास्नानमा भने हनुमानढोका दरबारस्थित शार्दूलजंग गुल्मबाट आउनुपर्ने गुरुजु पल्टन उपस्थित भएनन् । रथारोहणमा ललितपुरका सत्रौं शताब्दीका राजा सिद्धिनरसिंह मल्लको ऐतिहासिक खड्ग भने झल्लरवाल छत्रले ओढाएर सम्मिलित गराउने परम्परा रहेको छ ।

newskiran.com

newskiran.com

You May Also Like