रोज बोर्डिङ स्कूलको होस्टेलमा किशोरी बलात्कृत, आरोपित फरार, घटनाबारे प्रहरीमा जानकारी

सिरहाको एक निजी विद्यालयको होस्टेलमा एक बालिका बलात्कृत भएकी छन् । विष्णुपुर गाउँपालिका–१ मा रहेको रोज बोर्डिङ स्कूलको होस्टलमा खाना पकाउन गएकी १४ वर्षीय किशोरी बिहीबार मध्यराति बलात्कृत भएकी हुन् ।उनी आमालाई खाना बनाउन पालो दिन गएकी थिइन् ।

घटनापछि २५ वर्षीय एक शिक्षक फरार भएका छन् । घटना लगत्तै किशोरीले राति नै दिदीलाई फोन गरेकी थिइन् । उनकी दिदीले विद्यालयका सञ्चालक संजय यादवलाई राति १२ बजे फोन गरेर घटनाबारे जानकारी गराएकी थिइन् ।

विद्यालय संचालक यादवका अनुसार एक आरोपित शिक्षक राति नै फरार भएका हुन् । उनले भने, ‘बालिका राति नै घर जान चाहेकी थिइन्, मैले राति नजाउ भनेर राखेँ । बिहान अभिभावक आएपछि उनीहरुकै जिम्मा लगाइएको हो ।’

बलात्कार आरोपित शिक्षक यादव सिरहा नगरपालिका–१७ पटेर्वाका हुन् । उनले विज्ञान विषय पढाउँदै आएका थिए ।

जिल्ला प्रहरी कार्यालय सिरहाले घटनाबारे जानकारी आएको र यस विषयमा थप बुझ्ने काम भइरहेको बताएको छ । जिल्ला प्रहरी कार्यालय सिरहाका सूचना अधिकारी रविन्द्र राज पाण्डले पीडित आएको र उनका अभिभावकहरु आउने क्रममा रहेकाले घटनाबारे सोधपुछ गर्ने कार्य भइरहेको बताएका छन् ।