बिहेमा बेहुला नआएपछि प्रहरीमा उजुरी

करिब ७ सय जनाका लागि खानपानको व्यवस्था मिलाएर काठमाडौँ बानेश्वरको एक पार्टी प्यालेसमा विवाह भोज तयारी गरिँदै थियो । मूलथलो पूर्वी पहाडी जिल्लाबाट केटीको परिवारले जन्तीलाई खुवाउन भनेर चारवटा खसी पनि काठमाडौं ल्याएका थिए । काठमाडौँमा रहेका आफ्ना जिल्लावासी र चिने जानेका सबैलाई केटीका परिवारले निम्त्याएका थिए।

बिहान १० बजेदेखि आउने जाने निम्तालुको लर्काै चलिरहँदा १२ बजे आउने भनेका जन्ती भने आइपुगेनन्। केटी पक्षले फोन डायल गर्न थाले।आफूलाई इन्जिनियर बताउने वर आश्रेय बस्नेतले फोनमा आत्तिएको स्वरमा पारेर आफ्ना माइला बुवा अचानक बितेकाले आउन ढिला भएको बताउँदै भने, ‘यताको तारतम्य मिलाएर जन्ती हिँड्छ।’ सिनामंगल घर र आफूलाई डाक्टरको छोरा बताउने उनी दिन ढल्किँदा पनि जन्ती लिएर नआएपछि केटी पक्षमा हल्लीखल्ली मच्चिएको थियो।

जन्ती आउने आसमा सिंगो दिन बिताएपछि केटी पक्ष सशंकित भयो। आफन्तले महानगरीय प्रहरी वृत्त बानेश्वरमा खबर गरे। वृत्तका डीएसपी दुर्गा रेग्मीसहितको टोली पार्टी प्यालेसमा पुगेर सबै जानकारी लियो। डीएसपी रेग्मीले भने, ‘केटी पक्षका सबैको अनुहार मलिन थियो। उनीहरूको कुरा सुनेर म चकित परें।’

१५ दिनअघि काठमाडौंकै एक भव्य होटलमा भएको टीकाटालोपछि सोमबार बिहेको मिति टुंगो लागेको थियो। राति अबेरसम्म पनि जन्ती आएनन्, केटा पक्षका कोही आफन्त उपस्थित नभएपछि केटी पक्ष घर फर्किएको थियो।

उनको भनिएको घरमा पुग्दा थाहा भयो, उनी त्यहाँ डेरा लिएर बसेका रहेछन्। ‘हामी पुग्दा ढोकामा ताला थियो,’ डीएसपी रेग्मीले भने, ‘केटी पक्षलाई हजुरआमा भनेर चिनाइएकी मान्छे पनि फेला परिनन्।’

विवाहको निम्तो कार्डका लागि केटाले दिएका बाबु र आमाको नाम पनि फर्जी भएको खुल्यो। केटाको वास्तविक नाम साहिल बस्नेत रहेको प्रहरीले पत्ता लगाएको खबर कान्तिपुरले छापेको छ।

newskiran.com

newskiran.com

You May Also Like